भारतको सुरक्षा चासोमा बाधा पुर्या उने कार्यको लागि श्रीलंकाको भूमिको प्रयोग कहिल्यै हुनेछैन: राष्ट्रपति डिसानायके
भारतका विदेश मन्त्री एस जयशंकरले आफ्नो एकदिने कोलम्बो भ्रमणको क्रममा श्रीलंकाको नयाँ नेतृत्वसँग उच्चस्तरीय भेटवार्ता गर्दै श्रीलंकाको आर्थिक पुनरुत्थान र विकासप्रति भारतको प्रतिबद्धता पुनः दोहोर्याएका छन्। 

नवनिर्वाचित राष्ट्रपति अनुर कुमार डिसानायकेसँगको भेटमा उनले भारतकी राष्ट्रपति द्रौपदी मुर्मु र प्रधानमन्त्री नरेन्द्र मोदीको तर्फबाट हार्दिक शुभकामना व्यक्त गरे। यस अवसरमा दुई देशका जनताको हितमा भारत-श्रीलंका सम्बन्धलाई थप प्रगाढ बनाउनका लागि विभिन्न सहकार्यलाई गहिराइमा लैजाने विषयमा छलफल भयो।

विदेशमन्त्री जयशंकरले सामाजिक सञ्जाल ‘एक्स’ मा लेख्दै भने, “आज राष्ट्रपति अनुर डिसानायकेसँग कोलम्बोमा भेट गर्न पाउँदा सम्मानित महसुस गरें। राष्ट्रपति मुर्मु र प्रधानमन्त्री मोदीको तर्फबाट शुभकामना दिएँ। भारत-श्रीलंका सम्बन्धलाई बलियो बनाउने उनको मार्गदर्शनको कदर गर्छु। सहकार्यलाई गहिरो बनाउने र दुई देशका जनताको हितमा सम्बन्ध बलियो बनाउने बारेमा छलफल गरियो।”

भारतको विदेश मन्त्रालयले दिएको जानकारी अनुसार, बैठकमा सुरक्षा र रक्षा क्षेत्रका मुद्दाहरू पनि उठाइयो र भारत-श्रीलंकाको साझा हितलाई अझ सुदृढ बनाउने प्रतिबद्धता पुनः पुष्टि भयो। राष्ट्रपति डिसानायकेले श्रीलंकाको भूभाग कहिल्यै भारतको सुरक्षा हितको प्रतिकूल प्रयोग गर्न नदिइने स्पष्ट पारेका छन्। 

राष्ट्रपति डिसानायकेले पनि ‘एक्स’ मा आफ्नो धारणा राख्दै भने, “श्रीलंकाको आर्थिक पुनरुत्थानमा भारतको समर्थनका लागि म विदेशमन्त्री जयशंकरलाई धन्यवाद दिन चाहन्छु। यस भेटमा विभिन्न क्षेत्रीय सहयोगलाई सुदृढ बनाउने महत्त्वपूर्ण मुद्दाहरूमा छलफल भएको थियो।” 

विदेश मन्त्रालयले दिएको जानकारी अनुसार, ऊर्जा उत्पादन र प्रसारण, इन्धन र एलएनजी आपूर्ति, धार्मिक स्थलहरूको सौर्य विद्युतीकरण, डिजिटल पूर्वाधार, स्वास्थ्य, र डेरी विकासजस्ता क्षेत्रमा चलिरहेका पहलहरूलाई उनले उल्लेख गरे। यी परियोजनाहरूले श्रीलंकाको आर्थिक स्थायित्वमा महत्त्वपूर्ण योगदान पुर्याउने र आम्दानीका नयाँ स्रोतहरू सिर्जना गर्ने बताएका छन्।

राष्ट्रपति डिसानायकेले श्रीलंकाको समृद्धि हासिल गर्न भारतको आर्थिक सहयोग निर्णायक रहेको र हरित ऊर्जाको निर्यातले श्रीलंकाको उत्पादन लागत घटाउन मद्दत गर्ने कुरामा पनि जोड दिए। 

यसैबीच, विदेशमन्त्री जयशंकरले श्रीलंकाकी प्रधानमन्त्री हरिनी अमरसुर्यालाई भेटेर डिजिटल पूर्वाधार, तालिम र क्षमता निर्माणका विषयमा छलफल गरेका छन्। साथै, आफ्नो श्रीलंकाली समकक्षी विदेशमन्त्री विजीथा हेराथसँग पनि भेट गर्दै ‘छिमेकी पहिलो नीति’ अन्तर्गत श्रीलंकासँग द्विपक्षीय सहयोगको प्रतिबद्धता व्यक्त गरेका छन्। 

उनले पूर्व राष्ट्रपति रनिल विक्रमसिंघेसँगको भेटमा द्विपक्षीय सम्बन्धलाई थप प्रगाढ बनाएकोमा धन्यवाद दिए र श्रीलंकाको आर्थिक पुनरुत्थानमा भारतको निरन्तर समर्थनको प्रतिबद्धता व्यक्त गरे।